Polisi y’akarere ka Ruhango yatangije igikorwa cy’ikoresha ry’utunozasuku ku mugaragaro tariki ya 29/02/2012, ikaba yihanangirije abamotari ko uzafatwa atubahirije amabwiriza agenga aka kanozasuku azabihanirwa.
Abamotari bahabwa utunozasuku
Amwe mu mabwiriza abamotari ni uguha akanozasuku umugenzi agiye gutwara akakambara, kukajugunya ahabugenewe mu gihe karangije gukoreshwa, guca amafaranga y’ikirenga umugenzi yitwaje ko yaguze akanozasuku.
Polisi iha amabwiriza abamotari
Komanda wa station ya pilisi ya Nyamagana mu karere ka Ruhango Insipector Rwigamba Habibu, atangiza iki gikorwa k’umugaragaro yabwiye aba bamotari ko uzafatirwa mu ikosa rimwe, ko azajya acibwa amande y’ibihumbi 10.
Aka kanozasuku kandi bibukijwe ko umuntu agakoresha rimwe kagahita kajugunkwa ahabugenewe, abamotari bakazajya bakagura amafaranga 40.
Nsanzegahondogo Gabby ushinzwe imari mu karere ka Ruhango, yasabye abamotari ko bagomba gutangira gukurikiza amabwiriza agenga akanozasuku, ngo ntibashaka nta rimwe kuzumva hari ikibazo cyavutse hagati ya polisi n’abamotari bitewe n’akanozasuku.
Abamotari bo basabye ubuyobozi bwa polisi guha amahugurwa abapolisi bato, ngo kuko bafite impungenge z’uko bashobora kuzajya bafata umumotari ngo ntiyambaye akanozasuku kandi karagenewe abagenzi gusa.
Minisiteri y’ubuzima ivuga ko iki gikorwa nayo ubwayo izagikurikiranira hafi, hagamijwe kurinda indwara zaterwa n’umwanda uturuka muri kasike.
