Abantu batari bake bakunze kwigurira amata yateretswe n’abantu ubwabo aho kugura ayo mu nganda ziyatunganya kuko bavuga ko aba ahenze.

Abagenzi bakoresha umuhanda Kigali–Huye, usanga akenshi bakunze kugera mu karere ka nyanza, ahitwa kwa haji ndetse nahitwa kuri arete ho muri huye, bagahagarara kugirango bagure amata. Aya mata bagura ni aba yateretswe n’abantu ubwabo maze bakayagurishiriza mu tujerekani. N’ubwo mu karere ka Nyanza hari ikaragiro rya Nyabisundu ritunganya amata ku buryo bugezweho, abagenzi bavuga ko bakunze kwigurira ayo mu tujerekani.

Ku muhanda Butare Kigali usanga hari ahantu henshi hakunze gucururizwa aya mata aba ari mu tujerekani cyane cyane utwa litiro eshanu.

Hamwe mu hazwi gucuruza aya mata ni ahitwa i Mugandamure kuri uyu muhanda mu karere ka Nyanza. Amasaha hafi ya yose usanga aha haba haparitse imodoka zitwara abagenzi zaba iziva i Butare, i Burundi n’ahandi kugirango bagure aya mata yo mu tujerekani.

Ahitwa kwa Hadji niho hakunze kwinjirwa n’abagenzi, bagura aya mata cyangwa n’inyama zokeje, ziba zitunze ku dutwi tw’imidano.

Aha abagenzi bavuga ko batajya bifuza kugura amata yo mu ruganda kuko ahenze, umwe muri bo witwa Asumani Ahishakiye ati: “ubu kuko wajya kugura amata ya Nyabisindu cyangwa Inyange kandi ubona amata y’umwimerere aho adahenze, akajerekani ka litiro eshanu ni nk’icyatanu kandi ariya usanga akantu katageze no ku gice cya litiro ari amafaranga 350”.

Usibye abaguzi ariko abacuruzi nabo bavuga ko kurangura aya mata yatunganyirijwe mu makaragiro bitaborohera kandi akaba atabona icyashara, bityo bagahitamo gucuruza ayo mutujerekani. Hadji Saidi Hakuzimana, ucuruza aya mata, avuga ko abakiriya be batayabaza kuko bavuga ko igiciro cyayo kiri hejuru.

Ushinzwe abakozi mu ikaragiro rya Nyabisundu ritunganya amata. Kayiranga Erneste, avuga ko atemeranywa n’abaguzi, bavuga ko amata atunganyirizwa mu ruganda rwabo ahenze.

Agira ati : “amata yacu ntaba ahenze kuko niba agakarito tukagurishije 350 si menshi mu gihe twe tuba twakuyemo ay’agakarito kuyapima, kuyatunganya n’ibindi”.

Kayiranga asobanura kandi ko impamvu batitabira kuyagura biterwa n’uko bamwe mu borozi bahitamo kuyaha, abayitungayiriza bakayagurisha kugiciro gito.

Amata acururizwa mu tujerekani ku mihanda, akunze kunengwa ikibazo cy’umwanda kuko abantu baba batizeye uburyo yatunganyijwemo. Mu bihe bishize ikigo cy’ubuziranenge nacyo kikaba cyari cyaraciye ko amata yajya aterekwa mu tujerekeni kuko tudatanda isuku ihagije yayo.

Ku rundi ruhande ariko abantu banenga inganda zitunganya amata n’ibiyakomokaho ko bahanika ibiciro ntibatekereze ku muturage ufite ubushobozi buciriritse.

Iri karagiro   rya Nyabisindu ryatangiye mu 1937  na MINAGRI ubu rikaba rifitwe na MINADEF. Ritunganya amata afungwa mu dukarito twanditseho Nyabisundu ndetse rigakora na yawurte, byose biri hagati ya 3000-4000 ku munsi.Usibye iri karagiro ryari rinasanzweho mbere ya Jenoside, hagiye havuka andi, nk’uruganda rw’Inyange na rwo rutunganya amata.